粤语励志金句“马死落地行”

时间:2014-10-19 16:11:12 来源:南方都市报 收藏

我返工嘅公司,系广东人同莆田人合伙嘅。话之老细系边个都好,人哋出得份粮畀我,暂时来讲,份粮系薄咗啲,但揾食艰难,做乜嘢都系要捱,所以我算系落心落力。有日,大家出嚟劈酒,我嘅福建老板唔知系饮多咗,定还是系吐露真情,佢拍下我膊头话:“喇,你唔错口架,委屈你喇,一个大学生做低层,毫无怨言,好帮得手。”我喇喇临话“应该嘅,应该嘅”。跟住,老细话:“我发觉,你哋广东人做嘢呢,多数有一种唔怕辛苦嘅秉性。”我一时间有啲感触,跟住我接咗一句:“我哋广东人呢,由细听到大嘅一句话,叫做马死落地行。”老细搞明白咩嘢意思之后,亦都好赞同,同我一杯饮胜,当着大家,兴致勃勃噉同我开八我嘅广东老细以前做生意失败之后又点样起家嘅故事,对呢种性格赞口不绝。
 
“马死落地行”呢个金句,其实系粤语地区人士嘅养分,普通话冇呢种讲法,亦系家父自细教导过我嘅道理。就好似我老细噉,一场金融风暴打嚟,间厂嘅订单少咗,珠三角地带又开始难招工人,冇晒符,唯有本本分分噉,做啲生意仔,另谋出路,卒之东山再起。所谓“马死落地行”,听起身有几分悲壮嘅色彩。当然呢种讲法因人而异,“沧海一声笑,滔滔两岸潮”,你可以话系无奈,亦可以话系豁达。而我始终觉得“马死落地行”嘅做法充满能量,踏踏实实,落地有声。留得青山在,即使唔成功,平淡嘅生活都可以系好幸福嘅。所以呢种觉悟,相信正系呢个浮躁嘅社会所需要嘅。
 
 
我谂到我一位朋友,人品几好,做嘢都好有责任心,呢两年过咗美国留学。有一次,佢嚟我屋企玩,食过饭,佢忽然之间兴起,话想表演下洗碗“点样为之专业”。我正想话点好意思叫客人洗碗,佢话嚟就嚟,瞬间洗好一个碟。我同学笑口话,“出到去,咪以为我成日挂住沟鬼妹哦,实情我经常出去帮人哋洗碗。你话异国他乡,要安身立命,做人点可以招绩?发达社会,唔pro就冇出路,唔认真就冇前途,洗碗都做唔好,就真系要返顺德喇。”呢位朋友,其实家境并唔差,身在异国,作为广州土著一件,一样系实践咗“马死落地行”。
 
讲开又讲,而家我哋呢个社会,美国又好,中国又好,阶层嘅上流变得好艰难,香港人叫做“升level无望”。所以,今时今日我哋广府人,更加唔可以忘记呢种心态。马死落地行,老友,鬼叫你穷咩,顶硬上啊!

原标题:马死落地行

围观: |责任编辑:

本文链接:

继续查看有关: 马死落地行 | 的文章

若无特别注明,文章皆为粤语学习网-专业的粤语(广东话)学习网站事原创,转载请注明出处

你也可以分享到:
无觅关联推荐,快速提升流量

回到顶部
describe